Tupe fakanaa ko katoa tena lua sefulu tausaga
Fong ? 26/09/07
Te tupe fakanaa a Tuvalu ko tau nei o lasi tena fakamanatuga e fai i tena aso fanau i te masina nei.
Mai te fakatuuga i te po muamua o Oketopa 1987 mai te fesoasoani o taugasoa fesoasoani pela mo Egelani, Ausitalia mo Niusila, ko oti nei ne maua ne te tupe fakanaa te aofaki tupe e tusa mo te 65.7 miliona talaa.
I te po 30 o Iuni i te tausaga nei ko oko kona te aofaki a ia ne maua mai te 6.2 pasene te fanaka o ia i tausaga taki tasi.
Te failautusi o te tupe fakanaa ko Talavai Iona ne fai mai ki tala o Tuvalu me mai te 65.7 miliona tenei, e 24.1 miliona ne fesoasoani ki te pateti a te malo, 29.2 ne toe fakafoki o toe invest, kae koi toe nei te 12.4 miliona i loto i te tupe fakaleoleo a te tupe fakanaa tela i Ausitalia.
Te aso fanau o te tupe fakanaa ka fakamanatu tasi mo te tutokotasi o Tuvalu i te Aso Gafua o te vaiaso ma vau.
I pati a Talavai me i te tala fakasolopito o te tupe fakanaa ka faitaugina i te aso gafua mai tua o te poleni.
Taugasoa fesoasoani o te tupe fakanaa e aofia i eiNiusila, Ausitalia, Kolea ki Saute mo Tiapaani kae isi aka foki ne niisi taugasoa ko oti ne fakaasi olotou fia fesoasoani, kola i muna Tlavai me ko oti katoa ne kamigina ke fakatasi mai ki te fakamanatuga o te aso fanau tenei.
Te minisita o tupe tena malu Lotoala Metia mo te takitaki komiti o te tupe fakanaa ka fakatoka ne ia se kaiga fakapitoa i te po o te Aso Gafua mo fakamanatu i ei te katoaga o te lua sefulu tausaga o te tupe fakanaa.
Palele
