Tuvalu ka sui atugina ki te fakatasiga a tino tusitala i Saina
Ne tusi ne Yvette D'Unienville
Te Kampane fakasalalau mote tusitala e fakaogaa ne ia te kamiga mai Saina ke aofia ite kaumalaga fakasalalau telaa ka fanatu ki Saina.
A saina ka fakatoka ne ia se Polokalame fakatasi a fenua ote Pasefika i galuega tau fakasalalau telaa kafai i te fakaotiga ote masina o Oketopa kite kamataga o Novema i te tausaga nei.
te Menetia aoao ote Kampane fakasalalau mote tusitala Melali Taape ne fai mai, i polokalame penei e aogaa kii mo tinotusitala, e tauloto ne latou a mea e tupu i nisi fenua kae fakapau ki tulaga i Tuvalu kae se avanoaga foki o fakalei atu olotou atamai ite galuega.
Te kampane ko oti ne filifili ne ia a Diana Semi mai te matagaluega tusitala ke kaufakatasi atu ki tinotusitala mai te Pasefika.
Nisi Polokalame penei mo tinotusitala mai te Pasefika ne fai ite masina o Setema 2003, Setema 2005 telaa ne kaufakatasi atu kiei a te tinotusitala foki a te leo Tuvalu ko Yvette D'Unienville.
I ana pati me tigaa e uke kii a vaega mea ite Polokalame, se mea gali ke iloa a faifaiga a nisi maloo i tua atu, maumea o fenua, matagaluega fakasalalau, te olaga o tino kae pelaa mo Saina, ko ana fakatokatokaga mote faigaa tafaoga lasi kote Olympic ite 2008, telaa e tasi mai iei kote faitega o tena koga tafao e fakaigoa kote Birds Nest io me kote ofaga o manu telaa koi fai nei.
Te kamiga telaa e ui mai ite Ministuli o maloo ki tua atu o Saina e kilo o fakalauefa a faifaiga fakataugasoa i te vaa o Saina mo fenua ote Pasefika i feituu tau fakasalalau o tala.
A Saina ka fakatoka ne ia te faigaa tafaoga a te Olympic ite tausaga 2008 kae ko Tuvalu e e fakamoemoe ke kau atu kiei.
Palele
