Ulu o te malo ko foki mai Taiwan
Ne tusi ne Silafaga Lalua
Te Ulu o te malo o Tuvalu tena malu Apisai Ielemia ko oti nein e foki mai ki te atufenua mai tua o te fakatasi atuuga kit e talaaga o tafaoga mo tino se katoatoa tela ne fai I Taiwan I te masina nei.
Mea nei se kamiga ne pakuu mai te malo o Taiwan ke fanatu te Ulu o te malo pela me se tino kami fakaaloalo o te faigamea tenei, fakatasi foki mo niisi takitaki o niisi atufenua.
I tena faipatiga kit ala o Tuvalu I te tutonu o te aso nei, tena malu me I tena auala o fanatu ki Taiwan ne mafai a ia o faipati mo naai sui o niisi atufenua pela foki mo fakapotopotoga.
Ne fetaui a ia mo te sui maluga o Tiapaani ko Masashi Namekawa kae ne sautala laua ki luga I polotieki a Tiapaani kola e togigina ne ia pela mo te uafu lasi fou, te AM band a te fale fakasalalau, te malae vakalele fou mo sose polotieki tela e mafai ne Tiapaani o fakafaigofie mo Tuvalu.
I pati a Apisai me e sili ke toe fakamasaua e mea konei tiga ko oti ne faipati ki ei feitu e lua, ko tem ea ke seai se tatooga manafai ko oko ki taimi e tau ei o fakataunu a polotieki katoa.
Ne maua foki te avanoaga o tena malu o sautala mo te failautusi aoao o te fakapotopotoga fenua o te Pasefika ko te forum, ko Greg Urwin ki luga I mataupu a Tuvalu kola ka avaka ne tena malu te uluo te malo I te fonotaga a takitaki o fenua o te pasefika io me ko te forum I Tonga I te masina fou.
Tasi o mataupu taua ka avaka ne Tuvalu I Tonga ko te mataupu ko te mafulifuliga o tau o aso tela I pati a Apisai me ko lasi te faipatigina kae se mea e tau o fai soko ko te mea ke saga mai a fenua lasi kola e lasi te olotou fakamasei kit e vanimonimo ke pokotia ei tatou, kae maise I ei ke aumai olotou fesoasoani mo tatou pela foki fenua foliki kola e pokotia.
Palele
